Birkir Jón of ungur

Um leið og ég óska Sigmundi Davíð innilega til hamingju með sigurinn, sem ég styð heilshugar, verð ég að lýsa óánægju minni með kosningu Birkis Jóns. Ég hefði viljað sjá reynslubolta  (kyn skiptir minna máli) í sæti varaformannsins, nýja unga formanninum til halds og trausts. Höskuldur hefði átt að bjóða sig fram.

Líklega getur nýupperður Framsóknarflokkurinn sótt mest fylgi til óánægðra stuðningsmanna Sjálfstæðisflokks og Samfylkingar í næstu kosningum, en þeir eru margir á miðjum aldri. Mér finnst hins vegar ólíklegt að Birkir Jón Jónsson höfði til þessa fólks - því miður. Engu að síður er greinilegt að Framsóknarflokkurinn er mættur til leiks á ný og enginn skyldi afskrifa hann með Sigmund Davíð við stýrið.

Birkir Jón Jónsson nýr varaformaður

Boðið hennar mömmu, ágúst 2006

Ágæta frændfólk og vinir. Það eru komnar inn myndir frá boðinu hennar mömmu sem hún hélt fyrir gamla vini og vandamenn á pallinum í Bauganesi í ágúst 2006. Albúmið heitir einfaldlega "Boðið hennar mömmu". Solla mín afsakaðu hvað ég lét dragast að henda þessu inn. JPJ.

Verðum að ná verðbólgunni niður

Vaxtalækkun Seðlabankans er algerlega nauðsynleg til að styrkja gengi krónunnar og ná niður verðbólgu. Engir seðlabankar, né heldur IMF, myndu taka í mál að lána okkur gjaldeyri ef það vitnaðist að stýrivextir Seðlabanka Íslands (lántakandans fyrir hönd Ríkissjóðs) væru lægri en innlend verðbólga. Svo einfallt er það. Seðlabankinn er því að uppfylla eitt af skilyrðum IMF um leið og hann er að bregðast hárrétt við nýjustu verðbólgutölum Hagstofu Íslands. 

Stýrivextir hækkaðir um 6 prósentur

Myndir af ættarmóti á Eskifirði

Það eru komnar inn myndir frá ættarmótinu á Eskifirði (sjá albúm). Myndirnar eru því miður ekki margar en gleðja vonandi. Vinsamlegast sendið mér email á [e-mail] ef þið finnið staðreyndarvillur í textanum eða þekkið nöfn sem vantar. Fleiri myndir eru líka vel þegnar og enn frekar aðstoð við að uppfæra síðuna (notendanafnið er Jensen, lykilorð sent með email).

Kveðja, Jens.

Skrár tengdar þessari bloggfærslu:

• Hús Villa afa

Sammála Gylfa

Hinn grandvari og góði háskólakennari, dr. Gylfi Magnússon, er einn af þessum mönnum sem fær fólk til að sperra eyrun þegar hann tjáir sig um efnahagsmál. Það er því frétt í sjálfu sér þegar hann sendir bankaráði Seðlabanka Íslands (SÍ) og bankstjórninni tóninn og segir peningastefnu bankans hafa beðið skipbrot. Það er skelfilegt til þess að hugsa að stýrivextir á Íslandi skuli vera orðnir hærri en í Tyrklandi, sem er þriðjaheims ríki, og langhæstir í Evrópu. Hvað veldur þessu? Því verður bankastjórn SÍ að svara. Síðustu tvær hækkanir á stýrivöxtum hafa engin áhrif haft enn sem komið er. Ef gengið styrkist ekki á næstunni erum við Íslendingar komnir í öngstræti með krónuna. Færa má rök fyrir því að hækkunin í dag, sem kemur í kjölfarið á methækkun fyrir nokkrum dögum, sendi fremur skilaboð um taugatitring og úræðaleysi bankastjórnarinnar - þvert á það sem íslenska krónan þarf á að halda - en skilaboð um fasta og trúverðuga mótspyrnu. Í svona ástandi eru væntingar markaðsaðila langsterkasti þátturinn. Gylfi benti í fréttum Rúv á að sjö ár eru liðin án þess að hávaxtastefna SÍ hafi skilað okkur árangri. "Þetta er fullreynt" sagði Gylfi.

Fyrir nokkrum árum bárust fréttir frá Nýjasjálandi af árangurstengdum kjörum seðlabankastjóra. Er ástæða fyrir okkur til að skoða þannig fyrirkomulag? Er ráð að leita til sérfræðinga sem getið hafa sér gott orð eins og bent hefur verið á? Ég sting upp á Gylfa Magnússyni. Fólk treystir honum. Hann hefur einfaldlega þannig fas, ólíkt sumum í SÍ og á ég þá ekki við stjórnmálamanninn.

Verðbólgan er versti óvinur launþegans og þeirra sem leggja til hliðar. Hún étur upp sparnaðinn dregur þar með úr sparnaði smát og smátt þrátt fyrir háa vexti og verðtryggingu. Bílasalan fyrstu tvo mánuði ársins sýnir að almenningur er, þegar allt kemur til alls, ansi klókur. Hann hefur fundið á sér að gengið myndi falla og því drifu margir í að endurnýja fjölskyldubílinn í upphafi árs. Væntingar almennings reyndust réttar. Fyrir aðeins um 10 árum voru Spánn, Ítalía og Grikkland þekkt verðbólgulönd í Evrópu. Þau tóku upp Evruna og verðbólgan hjá þeim lækkaði í kjölfarið. Hún er að vísu nokkuð hærri en í mið Evrópu, en samt um helmingi lægri en á Íslandi. Í erlendum kennslubókum í hagfræði var Ísland ávallt í hópi með suðurevrópskum og suðuramerískum löndum í kaflanum um verðbólgu. Vonandi rötum við ekki þangað aftur.

Vextir fara í 15,75%

Rammgerður miðbæjarróni

Rammgerður miðbæjarróni e. Steindór Dan Jensen

Maður einn stendur og stynur
því stöku sinn yfir hann dynur
þráhyggjupest
svo þunglyndið sést.
Hann telst vera vínandans vinur.

Ómar nú öllarans strengur
er æpandi maðurinn gengur.
Hann labbar á hurð
og hrapar í skurð,
hinn óheppni aumingjans drengur.

Og sumir, þeir segja að hann sé dóni,
að söngur hans valdi öllum tjóni.
Það kann vera satt
að hann skuldi smá skatt
enda rammgerður miðbæjarróni.

Skáldið sem hætti að yrkja e. Steindór Dan Jensen

Hér sit ég og berst við að semja þér ljóð

og sum verða afleit og alls engin góð.

Því stórlega fátt sæmir stúlku sem þér;

stúlku, sem af öllum öðrum svo ber.

Samt mun ég seint hætta að reyna.

 

Og einstaka sinnum ég hugdettu hlýt

en hugdettan fer, svo ég blýantinn brýt.

Ég finn að innst inni býr ást mín og þrá

þótt engu mér takist úr höfði að ná.

Þú veist kannski vel hvað ég meina. 

 

Ég reyni oft að hugsa ei um stund mína og stað

og stundum tek pásu - læt renna í bað.

Og frasarnir myndast og fara á stjá,

en fannhvítur pappírinn bægir þeim frá.

Mér líst ekkert á þetta lengur.

 

Og stundum er bölsýnin bankar á dyr

ég blóta í hljóði og sjálfan mig spyr:

Hví get ég ei skrifað eitt skaðræðisljóð,

er skáldgáfan horfin í gleymskunnar flóð?

Er slitinn minn ljóðræni strengur?

 

Sorgbitinn arka ég örk minni frá

því aldrei mun framar með ljóðlínum tjá

ástina ljúfu sem brjóstið mitt ber,

en barnslega hjartað mitt slær handa þér.

Það hvorki er úr steini né stáli.

 

En jafnvel þótt ljólistin læðist á brott

mun lífið halda áfram jafnindælt og gott.

Ég ber ennþá innanbrjósts örlitla þrá

og ást sem ég láta mun héðan í frá

óma í óbundnu máli.

 

SDJ febrúar 2008. 

 

 

Steindór tuttugu og eins

Þetta er afspyrnu léleg frammistaða hjá mér. Síðasta blogg var skrifað í maí 2007. Ekki skilja þetta sem merki um að fátt hafi gerst hjá okkur síðan, þvert á móti - sl. ár var bæði viðburðarríkt og skemmtilegt. Steindór er nú orðinn 21 árs og gott ef fjölskyldan er ekki á góðri leið með að eignast skáld! Lesbók Morgunblaðsins birti í dimbilvikunni ljóðið "Andi jólanna" eftir Steindór okkar, sem yrkir í hefðbundnum stíl gömlu góðu skáldanna, sem hann virðist hrífast mikið af. Eftirfarandi ljóð eftir Steindór þarf því ekki að koma á óvart, en ljóðið orti hann á fyrstu vikum nýja ársins á meðan beðið var eftir niðurstöðunni úr almennu lögfræðinni, (H.Í) sem hann stóðst! Það var mikill létti (sérstaklega fyrir pabba :).

Gömlu skáldin

Eitt sinn kunnu íslensk skáld að skrifa
og skópu ljóð um vora fósturjörð.
Engum dylst að doðrantarnir lifa,
sem Davíð orti um fagran Eyjafjörð.

Þeir ortu um fegurð fjalla og náttúruna
og fólk sem hrærðist um í gleði og sorg
Þeir ortu um landsins tíðaranda og trúna
og Tómas orti um götur, stræti og torg.

Í guðsóttanum bitrir margir báðu
uns birti til - nú sól á himni skín!
Um Jesú Krist og Júdas margir kváðu,
en Jónas orti um ferðalokin sín.

En tíminn leið og kemur aldrei aftur,
því aldrei skrifa gömlu skáldin meir.
Máttur fylgdi kvæðum þeirra og kraftur
nú kann ei neinn að yrkja eins og þeir.

Steindór Dan Jensen janúar 2008. 

Finnbogi fyrirliði

Gleðin skein úr andlitum strákanna í 7. flokki KR er þeir tóku við bikarnum í Fífunni nýlega. Litlu KR-ingarnir gerðu sér lítið fyrir og unnu mótið. Finnbogi Manfred Jensen var fyrirliði að þessu sinni og þess vegna fékk hann fyrstur að lyfta bikarnum en það þykir mikill heiður. Finnbogi skoraði þrjú mörk í fimm leikjum og var í marki í einum leik.

KR eru bestir!

Skrár tengdar þessari bloggfærslu:

• FMJ fyrirliði lyftir bikarnum

Steindór tvítugur í dag

Hann Steindór okkar er orðinn tuttugu ára. Ótrúlegt hvað tíminn líður hratt. Ég man eftir fæðingardeginum hans eins og hann hafi verið í gær. Steindór kom í heiminn á Fæðingarheimili Reykjavíkur kl. 14:15. Ég mátti ekki mikið seinni vera til að missa ekki af fæðingunni. Á þessum tíma vann ég á Iðntæknistofnun uppi á Keldnaholti. Ég hafði verið í einhverju fyrirtæki að vinna eða í umferðinni svo ekki náðist í mig þegar kallið kom. Á þessum tíma voru náttúrulega engir farsímar til.  Þegar ég svo kom til baka upp á stofnun þá kallaði (öskraði) kerlingin í afgreiðslunni svo heyrðist um allt hús: "Jens þú átt að fara strax niður á Fæðingarheimili hún María er að fara að fæða". Ég þeystist niður í bæ og náði í tæka tíð. Allt gekk eins og í sögu. Steindór var með sérlega mjóa, langa og liðuga fætur að því er okkur fannst. Þess vegna líktum við honum stundum við frosk fyrstu dagana. Froskurinn er nú orðinn að prinsi og ef allt fer sem horfir þá verður hann stúdent frá MR í vor og lýkur miðstigi á píanó frá Nýja tónlistarskólanum á sama tíma. Það er engu logið þegar foreldrar segja að mesta gæfan sé fólgin í því að eignast heilbrigð börn. Þegar gæfa og gjörfuleiki bætist við er allt fullkomnað. Til hamingju með afmælið Steindór minn. Pabbi.